Luis Arrufatek, BCCko master eta ikastaro saileko chef koordinatzaileak, eta Alfredo Taboadak, BCCko sukaldaritza, teknika, produktu eta sormeneko masterreko irakasle titularrak, izozkien munduarekin lotutako hiru teknika berritzaile aurkeztu dituzte: azukrea erabat kentzea zapore gaziak sortzeko, pektinak erabiltzea eta metilzelulosa erabiltzea urtu ez daitezen.

Basque Culinary Centerren instalazioetatik, Luis Arrufatek —master eta ikastaro saileko chef koordinatzaileak— eta Alfredo Taboadak —sukaldaritza, teknika, produktu eta sormeneko irakasle titularrak— hitzaldi berritzailea egin dute izozkien munduan egin dituzten aurkikuntzei buruz, BCCk babestutako saioan. 

Azaldu duten lehen teknika izozki gaziak egiteko azukreen % 100 kentzearena izan da, ordura arte ez baitzen lortu. Emaitza hori lortzeko, sukaldariek ikerketa bat egin zuten. Hasteko, izozkiaren konposizioa aletu zuten eta azukreen portaera bera zuen osagai bat aurkitu zuten, ekarpen gozorik ez zuena. Ikerketa egin ostean, formulazioan inulina, kolagenoa eta glizerina erabiliz, nahi zuten emaitza lortzen zela ondorioztatu zuten.

Bestalde, bere izozkien zaporeak indartzeko, taldeak izozkien konposizioko ura (% 64a da) saldekin, likidotuekin edo infusioekin ordezkatzen zuela adierazi du.
Adibide gisa, ganba bisquez eta kenela izoztuz osatutako carpaccio bat egin dute, gatz kristalez eta limoi hautsez ondua. 

Landu duten beste teknika bat pektinekin lotuta dago. Barazkiak karearekin kontaktuan jartzen direnean kaltzio-pektato bihurtzen direla ikusi ondoren, pektinak gelifikatzaile bezala erabiltzea pentsatu zuten, ia edozein produkturekin molde harrigarriak sortzeko. Horixe egin dute azenarioarekin. Prozesu hori egin ostean (bideo batean ikusi ahal izan dugu), barazkiaren forma aldatzen zela ikusi ahal izan dugu, eta galeper eskabetxatuaz bete duten molde zilindriko bihurtu dute. Proposamena osatzeko, eskabetxe kenela bat eta perrexil kimuak erabili dituzte. Platera amaitzean, Taboadak nabarmendu du, bezeroari dagokionez, teknika horiek aplikatzen direnean garrantzitsuena "zapore ezaguterrazekin" osatzea dela, "mahaikidea ez nahasteko". 

Azkenik, teknika harrigarriena iritsi da: izozkia urtzea eragozten duena. Kasu honetan, metilzelulosaren erabilerari zor zaio lorpena, berotan jardun dezakeen gelifikatzailea baita. Arrufatek esan duenez, nahikoa da izozkiaren konposizioan % 0,9 jartzea emaitza hori lortzeko. Adierazgarri gisa, bikoteak baratxuri izozki bat prestatu du, gatzunetan ondutako gorringo batekin, ogizko tostada batzuekin, baratxuri-lore petaloekin eta izozkiaren itxura ahultzea lortu ez duen zopa bero batekin.