San Sebastian Gastronomika-Euskadi Basque Country, gastronomiari buruzko munduko kongresu zaharrena Kursaalera itzuliko da azaroaren 14tik 17ra, COVID-19aren krisiak eragindako egoera berrira egokituta. XXIII. edizioak Frantziara begiratuko du, eta Frantziako eta Espainiako sukaldaritzen arteko elkarrizketa berri bat zabaltzea proposatzen du. Aurten presentziala izango da kongresukideentzat, baina erabiliko den formatuari esker, 2020an estreinatutako lineako plataformaren bidez jarraitu ahal izango dute izena ematen duten guztiek, munduko bazter guztietatik.

Aurtengo edizioaren ardatz tematikoa Frantziako sukaldaritzaren errealitatea berriz ezagutzea izango da. Kontzeptu eraldatzaileenei helduko zaie, eta bertan egongo dira azaleratzen ari diren chef berriak, eta garai batean hain gertu egon ziren mugaren alde bateko eta besteko pertsonaia ospetsuak. 

Zuzeneko hitzaldiak eta jarduerak egongo dira, aurrez aurreko ikusleekin, eta baita mundu osoko jatetxeek plataforma digital berriaren bidez emango dituzten parte hartzeak ere. Kursaalera itzuliko da erakusketa gunea, enpresek haien produktuak erakusteko eta bertaratzen direnekin harremanetan jartzeko aukera izan dezaten. Frantziaren eta bere altxor gastronomikoen etorrerarekin, edizio hau abagune bikaina da Espainiako elikagaien industriaren berrikuntzak eta produktu nagusiak pozarren aurkezteko.

Beraz, Donostiako kongresua bere ohiko agertokira itzuliko da 2020ko urrian izandako esperientzia arrakastatsuaren ostean. Edizio hartan, lortu egin zuen sukaldaritzaren munduko sukalde ospetsuenetako batzuk planeta osoko milaka kongresukideren etxeetan sartzea, plataforma digitalaren bidez. Kongresu historikoa izan zen, lehen aldiz bost eguneko iraupena izan zuena, eta pandemia garaian ezinbesteko bultzada izan zena era honetako hitzorduentzat. 

COVID-19aren krisiak markatutako ingurune batean, zeinak bereziki eragin dion ekitaldien sektoreari, baina baita ere ostalaritzari eta sukaldaritzari, eskarmentu handiko kongresuak bere burua berrasmatu egin zuen proposamen digital propio batekin; eta gai izan zen bost egunetan 108 herrialdetatik etorritako 23.000 pertsona baino gehiago biltzeko, telebistako hainbat platotan egindako dozenaka esperientzia eta prestakuntza-hitzaldirekin, horietako batzuetarako Donostiako jatetxe onenetako batzuk plato bihurtuz. Guztira, goi mailako ikus-entzunezko 50 ordu eman ziren, itxaropenak handituz 'chef', enpresari, langile eta koronabirusak kolpean etendako jarduera indartsu bateko balio-kate osoarengan. Gipuzkoan izandako hitzorduaren ondoren, etorkizunari optimismo handiagoz begiratzea lortu genuen.

Lineako eta lineatik kanpoko munduen sinergia geratzeko iritsi zen, eta paradigma aldaketa ekarri zuen, kongresuen eta harreman profesionalen etorkizuna birpentsatzera bultzatu baikintuen. Eredu hurbilagoa da, agertokien aniztasunak aberasten duena, mundu mailan aitzindaria den formatu batekin. Izan ere, kongresuak ikusgai jarraitzen du www.sansebastiangastronomika.com webgunean, eta hainbat dira oraindik ere kongresua ikusteko izena ematen duten erabiltzaileak, amaituta egon arren. 70 hitzalditik gora egon ziren, 9 platotatik eman zirenak. Egia esan, Euskadiko jatetxe eta sukaldaritza eskola ospetsuenetako sukaldeak telebista-estudio bihurtu ziren, eta han egiten zuten lana mundu osora zabaldu zen. Chefen lan eta irakaspenei esker, haien egunerokotasunaren errealitatea, su artean gertatzen dena, ezagutzera eman ahal izan zen.