New Yorken jatetxeak dituen chef senegaldarrak, Pierre Thiamek, fonioa aurkeztu du San Sebastian Gastronomikan. Onura nutritiboez gain, onura sozialak ere badituen zereala da. Sukaldean beste edozein zereal ordezka dezake, arroza baino bost bider zuntz gehiago du eta hura hazten duten eremuetako (Mendebaldeko Afrika) herri askori finkatzen eta bizirauten laguntzen die.

Unibertsitatean arazoak izan zituelako irten zen Senegaldik, eta New Yorken ontziak garbitzen hasi zen. Orain, Pierre Thiam chefa ezaguna da Mendebaldeko Afrikako sukaldaritza goi mailako gastronomiaren mundura eraman izanagatik, Nigeria (Nok by Alara, Lagos), Senegal (Pullman Hotela, Dakar) eta AEBetako (Teranga, New York) bere jatetxeetan. Baina berak bere lan sozialaz hitz egitea nahiago du, bere Yolélé Foods enpresarekin egiten duen lanaz, alegia, Saheleko nekazari txikiei (batez ere emakumeak dira) merkatu berriak irekitzen laguntzen baitie, landatzen dituzten uztei esker biziraun dezaten.

Labore horietako bat da, hain zuzen, asteazkenean Gastronomikan aurkeztu duena. "Fonioa oso labore garrantzitsua da bertako biztanleak elikatzeko eta lurzoruak birsortzen laguntzeko, basamortutzea saihesteko helburuz, baina kuskusaren antzeko osagai berri bat ere bada; dena den, fonioaren kasuan zereala osorik dago. Beste batzuk baino azkarrago heltzen da eta mendebaldeko sukaldaritzarako baliagarriak diren propietate asko ditu". Ez du glutenik; bai, ordea, arrozak baino bost bider zuntz gehiago. “Gainera, oso ona dago”, esan du irribarretsu. 

Thiamek fonioa goraipatu du eta hura erabiltzeko masterclass bat egin du. Irakindako urarekin bost minutu eskasetan prestatzen da ("fonio katilu bakoitzeko, katilu bat eta erdi ur") eta, hozten utzi ondoren, fonio, jengibre, martorri eta batata (Afrikako tuberkulu tipikoa) kroketak egiteko erabili du, baina arrautzarik gabe, "batatak osagai guztiak loditzen baititu", edo entsalada bat egiteko ere erabil daiteke, menda, mangoa, tomatea, pepinoa eta perrexilarekin, limazko ozpin-olio bat gehituz eta fonioa beste osagai bat gehiago balitz bezala erabiliz. 

Behin aurkeztuta, senegaldarrak Afrikako sukaldaritza berriaren ildoak definituz parte hartu du, Gastronomikaren edizio honetan proposatzen zenari jarraituz. “Afrikan asko erabiltzen ditugu eskuak, informazioa ematen dizutelako. Osagaiak ukitu egin behar dira”, azaldu du chefak kroketak egin bitartean. Halaber, Afrikako kultura gastronomikoan partekatzeak duen garrantzia azpimarratu du ("oso abegitsuak gara"), eta baita osagaiekin asko jolasteak duen garrantzia ere, "oso errezeta gutxi ditugu eta. Seme-alabek gurasoengandik jasotzen dituzte”.

Kaliforniako bere etxetik konektatuta, chefak eskaera batekin amaitu du hitzaldia: "Pairatzen ari garen krisiarekin, baliteke hau une egokia izatea, chefok gehiago pentsatzeko eta laguntzeko, adibidez, klima-aldaketaren aurkako borrokan, gure elikadura-sistemarekin lotura estua baitu. Oso hondatuta dago”.