La Botica jatetxeko (Matapozuelos) chefak Gaztela eta Leongo zaporeak ezagutzeko sukaldaritza bidaia bat proposatu du, eta produktuaren eta produktoreen balioa azpimarratu ditu, baita ingurunea ere, jakien hornitzailea baita. 

Tierra de Sabor ekimak babestutako hitzaldi batean, chef valladolidtarrak erakutsi du lurraldeko produktuekin joko gastronomiko ugari sor daitezkeela. Hasieran, De la Cruzek Gaztela eta Leonek produzitzen dituen nekazaritzako produktuen aukera nabarmendu du: "ez soilik bere zabalera handiari esker, baita lurraldeko nekazaritza kultura bikainari esker ere". 

Zerealak, lekaleak, berdurak... Lurraren produktuak aipatuta bakarrik. Horiek guztiak erabiltzen ditu Miguel Ángelek bere sukaldean, bere plateretara eramateko lurraldearen esentzia. Interes berezia dute sukaldariaren ustez Gaztelako zerealek gariaren aukera handia baitago (kandeal, florentzia...). Baina ohiko erabilerez gain, La Botica jatetxeko chefak San Sebastian Gastronomika – Euskadi Basque Countryn erakutsi nahi izan du nola tratatu behar diren ernetzetik eta hartziduratik hasita zopa hotz bat egiteko. De la Cruzek zereala ernarazten du eta irekitzen hasten denean, urez betetako ontzi batean jartzen du hartzitzen. "Ur hori ozpin gisa erabiliko dugu azidotasun handia hartzen baitu", azaldu du sukaldariak. Hortik aurrera, eta ur horrekin batera pinaziak txikituta lortutako masarekin: "berakatz zuri baten modukoa egingo dugu, testurari dagokionez, baina Valladolidera eramanda". Platerean, oinarri gisa, Tudela del Dueroko baratzeko tomate barietateak jarri ditu, gainetik albaka eta zerealaren ura duen pinazien zopa.

Hasiera besterik ez zen. Miguel Ángel de la Cruzek bere lurraldeko beste produktu izar batekin, lekaleekin, bide berriak arakatuz jarraitu du, eta hau ziurtatu du: "aukera asko eskaintzen dituzte, egosteaz harago". Eta hori erakutsi du, zeren babarrunen pasta bat egin baitu babarrunak ur hotzetan hautsita, estrago ozpina erabili du eta hornitzeko amuarrainaren jelearekin (arrainaren marinadarekin egina) ondutako letxuga bat jarri du. De la Cruzek adierazi du lekaleek, halaber, oso ondo funtzionatzen dutela "torrefaktatuta saldak aromatizatzeko".

Eta baratzeko produktuetatik inguruneak eskaintzen dituenetara. Miguel Ángel biltzaileak hitz egin digu pinaburu berdeez eta sukaldaritzarako eskaintzen dituzten aukerez. La Botica jatetxearen inguruko basoa arakatzea ez da kontu berria sukaldariarentzat, eta kasu honetan baliabide hau aprobetxatzeko moduari buruzko lezio handi bat eskaini digu. Ardi esnetan egosi ditu pinaburu berdeak, "pixka bat otzantzeko, oso idorgarriak eta azidoak baitira" pinaburuaren inguruan gatzatutako esnetik sukaldariak pinuaren aroma zuen esne krema bat lortu du, izozki bihurtu duena. Pinaburua bere horretan ere aprobetxatu du. Zero zabor. Egosi ondoren, pinaburuekin salda egin du, eta pinaburuen krema bat eta behiaren hazikontxoa jarri ditu.