Valladolideko sukaldariak oda bat egin dio bertako produktuari, bere haurtzaroko lurretan zehar bidaia sentimental eta gastronomiko bat eginez.

La Garrocha (Valladolid) jatetxeko sukaldearen agintean dagoela, Chisco Alonsok bere lurraldeko produktua ohoratzen du, oso ongi tratatuz eta platerean merezi duen protagonismoa emanez. Horixe erakutsi du gaur San Sebastian Gastronomika -Euskadi Basque Countryn, Valladolideko Udalaren babespean, egin duen hitzaldian. Hiria etengabeko bilakaera gastronomikoan murgilduta dago, Chiscok berak zioen bezala: "lehen Valladoliden erretegiak baino ez zeuden, orain egunero berrasmatzen dugu gure burua, eskaintza ugari eta erakargarriekin". 

Dena den, bilakaera gastronomiko hori gorabehera, Valladolidek eta bertako sukaldariek produktu autoktonoei leial izaten jarraitzen dute, euren platerei izaera eta egiatasuna ematen baitizkiete. Alonsok horixe bera frogatu du, bere proposamen gastronomikoaren parte izango ziren produktuak aurkeztu dituenean, bere haurtzaroko paisaietan zehar bidaia sentimental bat eginez: "baratxuri-zelaiak, Valladoliden hain garrantzitsuak direnak; Sardóneko ibilbideetan dauden gaztandegi onak; Tudela de Dueroko baratzea, bere zainzuri eta karduekin; edo Traspinedoko esneko arkume ospetsua". 

Hogeita hamar egun baino gutxiagoko kume hauen zale aitortua izanik, Chisco Alonsok esneko arkume-hazikontxo plater bat proposatu du, karduarekin eta pinaziekin —“Pedrajasko pinaziekin, luzeagoak, lurrintsuagoak, zaporetsuagoak baitira"—. Sukaldariak hazikontxoak konfitatu egin ditu, ondoren glasatuz eta hutsean ontziratutako karduekin, pinaziekin, baratxuri krema batekin eta Serradako ardo belo batekin batera zerbitzatzeko; azken hori ere Valladolideko zigilua duen produktua da. Emaitza "plater xume bat da, betiko sukaldaritzakoa, baina zaporeak oso ezaguterraz egingo dituen grazia pixka bat duena". Hala deskribatu du chefak berak. 

Baina argi zegoen Valladolideko sukaldaritzaz ari ginela, bere pintxo eta barrengatik ezaguna den hiriko sukaldaritzaz, alegia, Alonsok plater beraren bertsio gehiago proposatu baititu. "Plater bakoitzarekin pintxo bat nola egin pentsatzen dugu, eta alderantziz, hainbat formatu eskaintzea gustatzen zaigulako, bezeroak nahiago duen moduan probatu eta dastatzeko aukera izan dezan". Horrela, bada, hazikontxo anoa, kardoekin eta pinaziekin, sandwich formatuko bi mokaduko pintxo bihurtu da. La Garrochakoek terrina bat muntatu dute hazikontxoekin, eta ogitarteko txiki formatuan aurkeztu dute, Sardón de Dueroko esne gordinez egindako gazta-tarta kremarekin. Lurralde oso bat platerean, edo barran, nolanahi ere, ingurune batekin eta bertako ekoizleekin zintzoa izateko pentsatua. Valladolid marka.