15 urterekin bi bider irakurria zuen Escoffierren eskuliburua, eta sukaldaritza eskola batean izena eman zuen gurasoei ezer esan gabe. Sukaldean aritzeko beste modu batzuk ere ezagutu zituen arren, Alain Ducasseren Louis XV jatetxekoa kasu, Clare Smyth (Antrim, Ipar Irlanda, 1978) Gordon Ramsayren ondoan iritsi zen izarra izatera, Londresen duen eta hiru Michelin izar dituen jatetxearen buru zela; horri esker, Erresuma Batuan hiru izar izan zituen lehen emakume sukaldaria izan zen. 2017tik Core (Londres) jatetxearen buru izan da eta bi izar lortu ditu bertan; 2018an, The World's 50 Best-ek Munduko Emakumezko Chef Onena izendatu zuen Smyth.  

Bere lorpenen artean, Harry printzearen eta Meghan Markle-n ezkontzako gonbidatuen oturuntza prestatzeaz arduratzea, Netflixeko The Final Table sukaldaritza saioan ohiko epaimahaikidea izatea, eta MasterChef Australian parte hartzea ditugu, besteak beste. Horixe da errealitatea, Gordon Ramsay jatetxean chef junior gisa lanean hasi zenean, astebete ere iraungo ez zuela esan bazioten ere.